ليه لازم تكون مبادر

0 310

من حوالى 200 سنة كان فى مزارع كبير في السن ^_^ قرر يتنازل عن ادارة المزرعة لواحد من ولاده الاتنين .. فاستدعى ولاده وقالهم ان :ادارة المزرعة هتروح للابن الصغير ! طبعا ابنه الكبير غضب وسأله عن السبب انه أخوه هو اللي يدير المزرعة مش هو ؟

الأب قعد يفكر شوية وبعدين قالهم : طيب انا محتاجكم في مأمورية ، محتاجين نزود الثروة الحيوانية في مزرعتنا ، وطلب من الأخ الكبير انه يروح لمزرعة جارهم ويسأله ان كان عنده أي بقرة للبيع ؟ فسرعان ما رجع الابن الكبير لأبوه وقاله ان جارهم عنده 6 بقرات ..
و بعدين طلب الأب من الابن الصغير نفس الطلب ، فراح الابن وبعد فترة رجع وقال لابوه “ان الجارعنده 6 بقرات للبيع.، وكل بقرة ب 2000جنيه و لو فكرنا نشتري اكثر من 6 بقرات، هيكون مستعد يخفض سعر 100 جنيه على كل واحدة ، بجانب ان ممكن أبقار جديدة ومن سلالة احسن هتيجي الأسبوع الجاي ، لو مش مستعجلين ممكن يستنوها . اما لو مستعجلين يقدروا يستلموا الأبقار التانية بكرة “.وساعتها اتلفت الأب لابنه الكبير وقاله هو ده السبب اني اختارت اخوك الصغير علشان يدير المزرعة ^_^

معظم الناس بيعملوا بس اللي بيطلب منهم ، وبيقوموا بالحد الأدنى من المتطلبات .. و بيحتاجوا لتعليمات محددة حولين معظم الحاجات اللي المفروض يقوموا بيها.

وهتلاقي على العكس ، ان اللي بيبقوا ناجحين بينخرطوا بحماس فى اللى مطلوب منهم و مش محتاجين انه تتم ادارتهم في كل حاجة . ومش الفكرة مجرد القيام بالمهمة ، ولكن انهم يقوموا بيها على الوجه الأصح والاكمل ، وكمان ليهم تأثيرهم على الاتجاه اللي بتروح ليه أي مشاريع أو أفكار مشاركين فيها .

و الأهم من كده ، ان اللي بينجحوا هم اللي بيحاولوا يوصلوا للناس ، ويطرحوا عليهم الأسئلة، ويقدموا توصياتهم ومساعدتهم، ويعرضوا أفكارهم .

كونك انسان ناجح بيتطلب منك انك تكون مبادر ومتستناش الحياة انها تجيلك بفرصها ، انك تكون ايجابي مش سلبي ^_^

وعلشان كده هتلاقي في كل مكان شغل قليل من موظفين اللي صعب استبدالهم. وفي معظم الأحيان، هتلاقي معظم الناس زي الابن الكبير اللي في القصة، سهل استبدالهم لان كل شغلهم بيعتمد على التعليمات المحددة اللي بياخدوها ، ومش بيشتغلوا الا لما حد يحكمهم ويديرهم في كل حاجة .

والمبادرة في معظم الأوقات بتتطلب درجة من المخاطرة ، لأنك بتحط نفسك في الملعب وانت عارف انك ممكن تخسر ^_^

و على العكس من ده هتلاقي ان القيام بس باللي بيطلب منك مش بينطوي على أي خطر ومش بتتحمل أي مسؤولية، فانت طول الوقت بتلعب في نصف ملعبك مدافع ومش بتحاول تهاجم ^_^

ياترى انت مبادر في حياتك ؟
للعلم انت عندك القدرة الكاملة انك تكون كده ، لأن الحاجة اللي ربنا سبحانه وتعالى شرفك بيها عن كل خلقه هي الارادة والقدرة على الاختيار و تأكد من حاجة واحدة (الحياة مش هتستناك )

اترك رد

لن يتم نشر عنوان بريدك الإلكتروني.