لية تطلب مصروف .. لما ممكن تشتغل ك Freelancer

0 115

الاسعار كل يوم بتغلى عن اليوم اللي قبله !! ومعظم طلبة الجامعة بيبقى محرج وصعب عليهم كل شوية يطلبوا من اهلهم فلوس زيادة !
طيب ايه رأيك .. متطلبش تاني ويبقى ليك مصدر دخل وانت طالب ^_^
من ناحية تنعش بيه ميزانيتك المنهارة
ومن ناحية تانية تطور من نفسك فى مجال دراستك

ازاي؟
الفكرة ببساطة انك تبدأ تشتغل من وانت طالب ك Freelancer من البيت و تقبض كمان بالدولار @@ .. الموضوع ده ليه فوائد كتير جدًا خاصة على المدى البعيد ..

أولًا بتبدأ تتحمل مسؤولية وتعرف يعني ايه شغل ويعني ايه مهمة مطلوبة منك وليها معاد تسليم، كمان بتعرف سوق العمل ماشي ازاي وطالب ايه، لان معروف ان جزء كبير من اللي بندرسه في الجامعة بيكون نظري وبعيد عن الحياة العملية اللي بشغلك وانت طالب بتدخل فيها من بدري وتفهمها وده هيساعدك بعد تخرجك، وهيحل ليك مشكلة الانتظار بعد التخرج اللي بتقابل الخريجين الجدد، اللي بيكتشفوا بعد مايتخرجوا انهم محتاجين يتعلموا من اول وجديد عشان يشتغلوا، انت ده تقدر تكون محققه ببساطة.

طيب ممكن اشتغل واتدرب في ايه وانا طالب؟

الحقيقة ان المجالات كتيرة ومتنوعة، ومش لازم تكون حاجة مرتبطة بدراستك 😀
ممكن يكون شيء قريب او حتى بعيد، الخبرة والمعرفة الزيادة عمرهم ماهيضروك، وممكن لو انت محظوظ تستغل اللي بتدرسه على ارض الواقع.
دي بعض الامثلة على اللي بنقوله:
التصميم:
لو انت طالب في هندسة، او فنون تطبيقية، او عندك شغف ببرامج التصميم ايًا كان البرودكت اللي هيطلع زي الاوتوكاد و ال Revit ..الفوتوشوب و illustrator
ف انت قدامك فرصة ذهبية، البرامج دي الشغل عليها دايمًا مطلوب ومتنوع، تقدر تمارس شغفك وتلاقي شغل كتير على مواقع مختلفة ” دة مقال عن : افضل منصات العمل الحر عبر الانترنت Freelancing  ” ، وممكن تعرض شغلك على مواقع متخصصة فـ الناس اللي بتوظف يعجبهم شغلك ويتواصلوا معاك، في بعض الامثلة دلوقتي لشباب حبوا اللي بيعملوه واظهروا ابداعهم ووصلوا للعالمية زي أحمد عماد الدين طالب الصيدلة اللي بيحب التصميم، وقدر يوصل ل فرقة بينك فلويد العالمية ويصمم غلاف البومهم الاخير 😀

الترجمة:
لو انت طالب في آلسن او مهتم باللغات و شاطر فيها من ثانوية عامة ، الترجمة من المجالات المطلوبة جداً و اللي ممكن تشتغل فيها كFreelancer .

البرمجة :
طلاب حاسبات ومعلومات وهندسة كومبيوتر، والغاويين برمجة عمومًا، مجال المستقبل 😀
مش محتاج اقولك مجالاته واسعة ازاي وانك هتلاقي فرص كتير، بداية من مبرمج لحد مصمم ومطور ومواقع وفروع تانية كلها مطلوبة.

دي كانت بعض الامثلة والباب مفتوح وواسع لكل اللي بيدور، لو انت في مكانك اللي اخترته من الاول وحابّه فـ دي نقطة بتساعدك انك تبدأ تشق طريقك من بدري، خبرة وتطوير من النفس مع كل شغل وفكرة جديدة انت بتنفذها، ولو انت في مكان غير اللي انت عايزه، ف الامثلة اكتر من ان الواحد يعددها عن الاشخاص اللي فضلوا ورا شغفهم ونجحوا، العلم موجود و متوفر حاليًا .. كل اللي مطلوب ارادة ورغبة حقيقية في تحقيق النجاح.

كمان دي سلسلة مقالات هيفيدوك جداً فى البداية :

دليلك للعمل الحر Freelancing #متستناش_الوظيفة

مبروك حضرتك بقيت صاحب شركة صغيرة

6 نصائح لإحتراف العمل الحر عبر خمسات

 

قد يعجبك ايضا المزيد عن المؤلف

تعليقات

Loading...