دليل المبتدئين في استغلال فرص المنح الدراسية

0 355

التجربة خير دليل ^_^ مهما اتكلمنا عن المنح الدراسية وعن الفرص المتاحة لناس كتيرر انها تكمل تعليمها خارج مصر .. هيفضل الموضوع ده بالنسبة لعدد كبير عامل زي الطريق المجهول مش عارفين يروحوا فين ولا يوصلوا ازاي !

لكن “اميرة” قررت تكسرحاجز المجهول وتسافر برة مصر تكمل تعليمها عن طريق المنح الدراسية …. ومش بس كدة دي قررت تشارك تجربتها مع مواطنين وادي المشمش وتحاول تنور الطريق لاكبر عدد ممكن يستفيد من فرص المنح الدراسية

في البداية اميرة بنت زي اي بنت مصرية خلصت ثانوية عامة واختارت تدخل كلية زراعة وتفوقت في كليتها وكان هدفها في الوقت ده انها تتعين معيدة في الكلية لكن كالعادة اللي اتعينت بنت رئيس القسم … ورغم احباطها لكن قررت تكمل ماجستير وشجعتها المشرفة علي رسالتها د/ شادية علي الاهتمام باللغة … وفعلا بدات تشتغل علي نفسها وتطور من مهاراتها من الصفر خدت منحة من مايكروسوفت 3شهور وانضمت ل American Center 6 شهور وقدمت في منحة لمؤسسة امريكية واترفضت مرتين…….ورغم كده ميأستش عرفت نقطة ضعفها اللي اترفضت بسببها واشتغلت اكثر علي نفسها وبدات تحضر اي ايفنت في المركز الثقافي البريطاني والامريكي وتمارس اللغة

وبعد سنة ونصف حاولت للمرة الثالثة وقدمت في منحة  CCIP Fulbright الامريكية  للتبادل الثقافي الممولة بالكامل واتقبلت فيها ووقفت الماجستير وسافرت واختارت تدرس الدبلومة في مجال الاعلام وعاشت في امريكا 9 شهور مابين ولاية بنسلفانيا وفلوريدا واتعرفت علي ثقافات مختلفة وعاشت مع اسرة امريكية فترة ومارست اللغة بشكل افضل

amira 2

وبعدين رجعت مصر سنة وقدمت في Camphill Village Kimberton Hills وهي منظمة غير ربحية اتطوعت فيها واخدت دبلومة سنتين في مجال الزراعة العضوى وفي الوقت ده اشتغلت في امريكا في مجال دراستها واكتسبت خبرات اكثر

ورجعت مصر و اشتغلت في مشاريع تنموية لمدة سنتين

لحد ما نزل اعلان عن منحة Australia Awards لدراسة درجة الماجستيرممولة بالكامل ودي كانت من اصعب المنح الدراسية لشدة المنافسة العالمية عليها ده غير ان الانترفيو كان في كينيا لكن كل المصاريف كانت من ضمن المنحة ولما سافرت كينيا للانترفيو كان في 22 مصري اختاروا 4 كانت هي من ضمنهم ومش بس كدة دول سفروهم اثيوبيا يدربوهم علي نظام المعيشة في استراليا والمنحة دى خدت من التقديم فيها للقبول للسفر سنة ونصف وسافرت درست IELITS   3 شهور واخدت الماجستير  في مجال الامن الغذائي في سنة

وده من المجالات المهمة جدا اللي مطلوبة في قارة افريقيا

واميرة حاليا بتدرس لغة فرنسية لانها بتسافر مؤتمرات وبتقدم تدريبات ومحاضرات في مجال الامن الغذائي والتنمية المستدامة في دول القارة الافريقية وجزء كبير من سكانها بيتكلموا الفرنسية فيبقي سهل انها تتواصل وتفيد بخبراتها اكبر عدد ممكن .

وبتقول ان من اهم مميزات المنح الدراسية  انك بتدرس مجانا والمنحة بتساعدك من تقديم الفيزا وموافقة الجامعة .. ده غير ان وضعك بيكون مميز جدا … يعني مش هتحتاج تدفع دم قلبك وتسافر وتكسر فيزا وتتبهدل وتعيش منبوذ وخايف تتمسك وتترحل .

ومن من اهم شروط المنح الدراسية اللغة

لكن بعض المنح بتدى تمويل لدراسه اللغه اذا تم قبولك زي منحة Australia Awards لكن اتوقفت حاليا في مصر ومنحه تركيا و DAAD المانيا

والهدف في اغلب المنح من توضيح نشاط الطالب زي النشاط الرياضي او التطوع في جمعية خيرية هو التعرف علي

شخصية الطالب هل هو شخص ناضج وعنده خبرات في الحياه ويقدر يعتمد علي نفسه ولا لا

وفي النهاية بتنصح الشباب انهم يتابعوا منح الحكومات زى الصين و الهند و المجر و اليابان ودايما يختاروا الصحبه الصالحة اللي تشجعهم ويستغلوا وقتهم في ممارسة نشاط رياضي وتعلم  وممارسة اللغة لانها مهمة جدا في التواصل مع المجتمع اللي هيعيشوا فيه.

قد يعجبك ايضا المزيد عن المؤلف

اترك رد

لن يتم نشر عنوان بريدك الإلكتروني.